يارسان  ئاييني  جه‌ وه‌رکوت‌و کوردستاني

چه‌خاوه‌رزه‌ميني                 چه‌خاوه‌ر زميني
بارگه‌ي شام وه‌ستن             چه‌خاوه‌ر زميني
حوكمش مه‌گيلا                  يه‌سار و يه‌مين
خوه‌ر چه‌خوه‌رئاوا              ماوه‌رو په‌سين
مه‌له‌كان چه‌عه‌رش              ماوه‌رو زه‌مين
هه‌ر كه‌س ناراسن               ئه‌وسا ماو غه‌مين
»پير كاظم كنگاوري«

ئايينو "يارسان "ي يادگارێوه‌  جه  ‌ويرو باورو گۆره‌پياکا  کۆردستاني ‌قه‌راخ‌و  گاماسياو و سه‌يمه‌ره‌و سيروان‌و سايه‌سارو شاهۆ و دالاهو و ئه‌لوه‌ندو و بلوران‌و درود فرامانو دلفان‌و کوهده‌شت تا که‌رکوک و . . .  ين .  چي واته‌ي  شيعري – که سه‌ره‌نه ئاما -   »پير كاظم كنگاوري« که ‌يۆ پيرو دۆره‌و سلتان سه‌هاکي بيه‌ن پێ‌ما به‌رگنۆ که‌ بنه‌ره‌ت‌و ئي ره‌سم‌و ئايينه‌يه‌ جه‌ وه‌رکوت‌زه‌مينه‌نه - مشرق زمين - کنيان و هۆرچنيان ,  به‌ پاو  نه‌زه‌ره‌و  بۆنيانگۆزارو ئي ئايينه‌يه‌, فريشتێ ,  که ‌جه ‌باورو ئايينه‌کاي ته‌رو دنيێ ,  ئينێ ئاسمانه‌نه‌و دلێ نۆهۆم‌ه‌کا  سه‌رو ئي دنيێ و سه‌ره‌و ئينسانه‌کا و به‌شه‌ره‌کاوه‌ ژيوا  , مه‌ياره‌ وار پێ زه‌ميني و  دلێ خه‌لک و ئي دنيێ  .  و هه‌ر که‌س که  ‌رێ‌وه‌ پێچ‌و سه‌خت گێرو  خه‌مگين و ناهميد بۆ چونکه ‌ئي ئايينه ‌ويرێ تازه‌ش چه‌نه‌ن و چه‌ني ويه‌رده‌و باوره‌ولينه‌کا گژيۆ و پێسه‌ ويرو باورێ  ئينقيلابي وينيۆ و ته‌ماشه‌کريۆ . واتێ يارساني به‌شيوه‌و شيعري هۆرخۆلقيان که‌ئانه‌يچ گێلۆوه ‌پێ شێوه‌و ره‌وشت‌و ئايينه‌ وه‌لينه ئێرانيه‌کا و کۆرده‌کا وه‌رکۆتۆ دلێراسيني پێسه ئه‌وێستاي و به ‌شێوه‌زوانه‌کا وه‌رکۆتو کۆردستاني - گۆرانو هۆرامي و لۆري و و له‌کي - و فارسي واچيێ‌نێ . هه‌ر پيرێ و هه‌ر بنه‌مالێوه‌ جه ‌هه‌رێمو زنجيره‌که‌شه‌کا  زاگرۆسي  چه‌ني  لواي  پێ  بلوران‌و سيروان خزمه‌تو بارۆل و شاخوه‌شين و سلتان سهاک ياوێنێ  که‌مالاتي مه‌عنه‌وي و ئه‌رزشي "ياري " و ده‌سشا که‌رده‌ن شيعر واته‌ي و نياره‌ي واتێوه  پێسه  ‌يادگارێوه  جه  وێشا .

 ئايينو "ياري " چه‌ني حاکمه عه‌ره‌به‌کا "بني اميه‌" و " بني عباس " جه‌نگ و گژياي‌نه بينێ و پێ به‌رکۆته‌ي هه‌راله‌و ويرو باورو ويشا زه‌حمه‌تێ يه‌کجار فره‌شا کێشان و چه‌ني حه‌ق په‌ره‌ست‌و ئازادي خوازه‌کا - جه‌بابه‌ک خۆره‌م دينو, ئه‌بو مۆسليمي - هه‌مکاريێ فره‌شا بيه‌ن   هه‌ر پي بۆنۆ  تاومێ  وه‌ش‌که‌رده‌ي سپاي نۆسه‌دي شاخوه‌شين جه‌هه‌مه‌دانو نه‌هاوه‌ندو که‌نگاوه‌رو لورستان و شاره‌زور نامێ به‌رمێ  , مه‌رکه‌زي‌چش ته‌کيه‌و خوه‌شين جه ‌بلوران ‌بيه‌ن که به مله‌و ياراني قه‌ديم ي مه‌شهور بيه‌ن ئي ته‌کيي دماي چند سه‌د سالێ ياوۆ لا خانو ئايري و يارانو ئايري چ جه بلوران ده‌س که‌را به سامان‌داي ويرو باورو " ياري " .

 دماي شاخوه‌شين ي گۆره‌ته‌رين جولياي و بزوتنه‌وه‌و " ياري "  جه‌ هۆرامانه‌نه‌و ده‌گاو شيخاني پته‌و کريۆوه‌. سلتان سهاک جه‌ده‌گا شيخانو هۆراماني به‌نياره‌ي و ريکوسته‌ي قواعيدي و بياو به‌س " ياري " ,  ده‌س په‌نه‌که‌رێ گۆره‌پێسه‌شاخوه‌شين ي پێ   هه‌ميشه‌ي زينده‌و جاودان بۆ و ياوو " ناميرايي " .