"به‌وێ‌په‌رمای"  زارۆلا   فره‌ته‌ر که‌رمێ 

ته‌شویق  نه‌که‌رده‌ی ,  گۆره‌که‌رده‌ی که‌م و کۆریه‌کا , هۆردای شکسته‌کا زارۆله‌ی , هه‌رمان‌و مه‌سولیه‌ت نه‌دای په‌نه‌ش و نه‌زان ونه‌تاو ئه‌شناسنای زارۆله‌ی جه هه‌رمان‌که‌رده‌ی ,  ته‌حقیرو گۆلانه‌هۆردا  زارۆله‌ی  جه  جه‌مه‌نه بۆنۆ درێژی بالا  یا کۆلی بالای و هه‌رعه‌یبێ لاشه‌یی ته‌ر و. . .  هه‌ره‌شێوه  گۆرێنه پێ فۆتیای "‌وێ‌په‌رمای" زارۆلا . هه‌رکام  جه  ئێمه  رۆ  نه  توشو  که‌سانێ مێمێ  که  مه‌تاوا دوێ که‌لیمێ  دلێ  جه‌معی‌نه  قسێ  که‌را !  یا ئیراده‌و وێ‌نیشان‌دای‌شا  نیا , ئه گه ریچ جاروبارێ یاگێوه‌نه  قسه و باسێ  که‌را زوانشا  گنۆ  پته‌پتو و ترێ گنا ! . به پاو ته‌عریفو هه‌رمان‌ناسا ( پسپۆرا ) "به ‌وێ‌په‌رمای" , په‌رمای ئینسانی به وێشا ! . که‌سانێ که  به چه‌م‌ی خاس مدیا وێشاره , ژیوا و زینده‌گی‌نه سه‌رکۆته‌یێ  فره به‌ده‌س مارا .

خانه‌واده مهیمته‌رین یاگێ‌نه پێ ده‌س‌کۆته‌ی و به‌ده‌س‌ئارده‌ی " به‌وێ‌په‌رمای" . ته‌شویق نه‌که‌رده‌ی , گۆره‌که‌رده‌ی که‌م و کۆریه‌کا , هۆردای شکسته‌کا زارۆله‌ی , هه‌رمان و مه‌سولیه‌ت نه‌دای په‌نه‌ش و نه‌زان ونه‌تاو ئه‌شناسنای زارۆله‌ی جه هه‌رمان‌که‌رده‌ی , ته‌حقیرو گۆلانه‌هۆردا  زارۆله‌ی جه‌مه‌نه بۆنۆ درێژی بالا  یا کۆلی بالای وهه‌ر عه‌یبێ لاشه‌یی ته‌ر و . .  هه‌ره‌شێوه  گۆرێنه پێ فۆتیای "‌وێ‌په‌رمای" زارۆلا .

"کارل راجز" -که ره‌وان‌شناسێ ئینسانگه‌را‌ن - جه باره وته‌قویه‌ت‌که‌رده و " به ‌وێ‌په‌رمای " زارۆلا  ئینا  سه‌رو ئی برواینه  که  وه‌ختێ  زارۆلێوه  لا  ئه‌داو  تاته‌ی  یا  مه‌علیماوه گنۆ وه‌رو چه‌می و قبول‌کریۆ . ئی وه‌رچه‌م‌کۆته‌ مۆسبه‌ته بێ هیچ شه‌رت و شروتێ بایس بۆ که زارۆله دلێ وێشه‌نه ئیحساسو ئه رزش و ئیتمینانی که‌رۆ . پی جۆره وێش به ته‌مام‌و که‌م وکۆریا قبول که رۆ و دیگه رانیچ هه‌رپاسه . ئینه وێش بۆ بایسو ئانه‌ی که زارۆله جه ئیرتیبات گرته‌ی چه‌نی که‌سانێ ته‌ر مۆشکله و گرفتاریش نه‌بۆ و جه نه‌تیجه‌نه چیوێ ته‌رسناک به نامێ " وێ نه‌په‌رمایش " توش نمێ .

ته‌شویق که‌رده‌ی فره‌ته‌ر جه ئه‌نازه‌ی به تایبه ته‌شویقێ  که ره‌نگو رۆشوه‌ی ! به وێ گێرۆ نه ته‌نیا زه‌ره‌رش هه‌ن به‌لکو بایسو دلسه‌ردی و ناهمیدی زارۆله‌ی بۆ . رۆحو زارۆله‌ی ته شنه و ته‌قدیر , ته‌حسین و ته‌شویقین . مۆحتاجو ئینه‌ین که بزانۆ یا  یاوۆ پینه‌ی  که هه‌رمانه‌کێش به گردی , کۆتینێ وه‌رو چه‌م‌و ئه‌داوتاته‌یو و چه‌نه‌ش رازیێنێ . پی جۆره حه‌زکه‌رۆ هه رمانه خاسه‌کا  دوباره که‌رۆوه . ئه داوتاته بشۆم  ره‌فتاره خاسه‌کێ  و شه‌خسیه‌ته عاله‌که  و   زارۆله‌ی  وزا  وه‌رچه‌م‌ش و تاوای زارۆله‌ی پێ خاس‌هه‌رمان‌که‌رده ی په‌نه‌ش یاونا و واچا , ئه‌گه‌ریچ جه برێ یاگانه که‌میێ وینا  به  گۆره‌که‌رده‌ی  نۆخته  قوه‌ته‌کا ته‌رو زارۆله‌ی  ئا که‌میا  پۆشناره و جه به‌ین‌ش به‌را . جه  ته‌حقیرو گۆلانه‌هۆردای و ته‌قای‌چۆرو  زارۆله‌ی  بۆنۆ  نمرێ ده‌رسی  که‌مته‌ر جه  ویسی  وێتا  پارێزندێ و ئه‌چی   جۆره  وه‌ختانه  پێ  جۆبران‌که‌رده‌ی  کزی و زایفی  زارۆله‌ی فرسه‌تێش دێدێ  په‌نه و یاردی ته مامیچش دێدێ . زارۆله‌ی  فێرو ئیحساسو ئه‌رزشمه‌ندی  که‌ردێ و پێسه  ئه‌ندامێ رێک و خاس جه یانه‌نه قازانجش چه‌نه گێردێ و جه  هه‌رماناو  یانه‌یه‌نه  به‌ش‌دارش که‌ردێ . هه ر ئه‌رکێ جه ئه‌رکاو یانه ی که دریۆ به زارۆله ی بشۆم  وه‌رلوای‌ش چا هه‌رمان‌و ئه‌رکه‌یه که دریانش په‌نه وه‌رچه‌م تا بۆ و  شۆنگیری‌ش  بیدێ ,  وه‌رو وێتا مه‌گێردێ جه ته‌شویق که‌رده‌یش چونکه یۆ جه فاکتۆره‌کا پێ بیه‌ی " به‌وێ‌په‌رمای" زارۆلا ته‌شویقی سه‌رو ‌وه‌خت‌و زارۆله‌یین . پێ وه‌ش‌بیه‌ی " به‌وێ‌په‌رمای "  دلێ زارۆلانه بشۆم ئیمکانو ئیجازه‌شا په‌نه دریۆ که ئیحساساتو وێشا نیشانه بدا و برێ جاریچ  ره‌خنه جه ئه‌داو تاته‌ی گێرا و ئادیچی وه‌راوه‌رو ره‌خنه‌که‌یشا تندێ نه‌با و ناحه‌ق وه‌راوه‌رشا  نه‌مدرا . حه‌رگیز  به‌ینو زارۆله‌کاتا  فه‌رق مه‌وزدێ چون فه‌رق‌وسته‌ی  وێش  عاملێوه‌ن  که دمایی و  جه درێژایی ژیوای  , ئیحساسو گۆلانه‌بیه‌ی و حقاره‌تی جه زارۆله‌ینه وه‌ش که‌رۆ و ئادی فیرو ته‌نیایی و گۆشه‌گرته‌ی که‌رۆ . هۆشتا  بۆ  که زارۆلێوه که ئیجازه‌ش په‌نه دریۆ که ئیحساساتو و ویرو بروێ فره ره‌حه‌ت  و  ئاسان واچۆ خاسته‌ر و رێکوپێکته‌ر تاوۆ  جه نه‌وجوانی و جوانینه سازگاری‌ش بۆ .

ئه‌داوتاته  بشۆم  سه‌عیه که‌را  هیچ چیوێ پێسه وه‌شلانه‌ی یا زه‌ره‌تالی , درێژی یا کۆلی , زرنگی و زیره‌کی یا ته‌مه‌لی و که‌م هۆشی و . . .  هه‌ره‌شێوه با  پێ   فۆتنای و جه ده‌س دای  " به‌وێ‌په‌رمای " زارۆله‌ی .

نۆختێ مهیم  فێرکه‌رده‌و " به‌وێ‌په‌رمای " یا ! ؛ که ئی فێربیه‌یه  جه  رابیته و ئه‌داوتاته‌ی چه‌نی یۆترینی  یاوۆ لا زارۆله‌ی , ده‌س‌وه‌شی‌که‌رده‌ی  و قه‌در‌زانای ئاداو تاته‌ی جه یۆترینی وه‌رو چه‌مو زارۆلاوه , ئه‌رزش نیای   زه‌حمه‌تو  یۆترینی  , نیشاندای و ئه‌شناسای  قابلیه‌تا خاسو ئیجتیماعی یۆترینی به زارۆلا و ته‌شویقو ته‌حسین جه ئه‌نجامو هه‌رمانا دلێ زارۆلانه تاسێرێ مۆسبه‌تش هه‌ن .