|
|
|
|
ئهلفوبێ لاتین پێ کۆردهکا ! |
|
|
ورای رژیمو سهدامی باس و مهزننێ فرێش پێ ئایندهی سیاسی و
یاگێو نۆعو هورچنیهی هێزهکا و ساختارو دهسهلاتی پێ
ئایندهی وستهن شۆنۆ وێش . یۆ جه ئا باسا که تا ئارۆیچ ئینا
سهرو نێگهرانی ههیمهکهی , باسو کوردهکا جه باکورو
عێراقین .دۆلهته هامسێکێ و بهتایبه دۆلهتو تورکیای گۆرانکاریهکا
عێراقو دمای سهدامی نامتمانهو به شهک و تهردید تهماشه
کهرۆ و نیگهرانی و خهمه ئهمنیهتیهکا وێشا چی بارهنه
مهتاوا شاراوه .
راسیهکهش ئانهن که ههر جۆره گۆرانکاریێ جه باکورو عێراقی
تهنیا مهبهسیۆوه به کۆردستانو بهشو عیراقی و تاسیراتو وێش
سهرو ههرێمهکهیۆ به گردی و تۆرکیه, ئیرانو سوریه بهتایبه –
که شمارێوه فره جه کهمینهو کۆردیشا چهنهن – منیۆ . ئا
چێوه که ئی نیگهرانیا فرهتهر کهرۆ , پێوهنێ فره نزیک
پێسه ههمپهیمانی کوردهکا ئی بهشه جه عێراقین چهنی
دهسهلاته خارجیهکا بهتایبه ئهمریکا و ئیسرائیل که گێره
ئارهزو و وهرمانێوه پێ وارای ( فارای ) دۆلهتهکا ههرێمو
وهرکۆتی دلێراسین(خاورمیانه)ی شا دیه بۆ . ملیگهرایی (
نهتهوایهتی ) کوردی که جه هۆرسهنگنای گردو جهرهیانه
ملیگهرایه نهتهوه ئهسلیهکا تهرو وهرکۆتو دلێراسین(
خاورمیانه) ی - ملیگهرایی عهرهبی جهعیراقو, ملیگهرایی
تۆرکی جه تۆرکیا - گرایشێ وهرچهمش روهو رادیکالیسمی ههن ,
به مهیلێوه فره گهرهکشا جیاوازی وێش و نهتهوهکا تهرو
ههرێمهکهی پهررهنگ و فرهتهر کهرو - بیگانهستیزی - .
کۆردهکێ عێراقی ههر پی بۆنۆ -بێگانهستیزی- جه ویهردهنه
ههنگامانێوهشا هۆرگرتێنێ . پێ نمونهی به پافشاری ههمپهیمانی
کۆردی و پشتیبانی دۆلهته وهرنیشته-غهربیه -کا و بهتایبه
ئهمریکا جه قانون - دهستور-و ههمیشهیی تازهو عێراقی
ههرێمو کۆردستانی ساحێبو پارلمان , زوان , دۆلهتو ئالا ی
تایبهو وێشا . دهستوری ههمیشهیی عێراقی ههر پاسه بیهی دوێ
نهتهوێ عهرهب و کوردی چا وهلاتهنه و دوێ زوانێ عهرهبی و
کوردی جه گردو عێراقی به شکلی یاسایی و رهسمیش ئهشناسان .
جیا چانهیه رابهرایهتی کوردی فرهجار دوپاتش کهردهنۆ
کهئیجازهو ئامادلێ ئهرتهشو عیراقی بهههرێمو کوردستانی مهدۆ,
ههرپاسه ئیجازهو هۆرکهردهو ئالا عێراقی چا ههرێمهنه به
دۆلهتی ناوهندی بهغدای مهدا .
ئی پروسه , رهوشو جیابیهی - دورکوتهی -عێراقو ههرێمو
کوردستانی رۆ به رۆ فره کهرۆ , به جۆرێ که ههرێمو کوردستانی
بهشێ جه جێهانو عهرهب و ئهندامو یهکیهتی عهرهبی نیا -
جهحالێوهنه که وهزیرو خارجهو عێراقی که کۆردا مهجبورا جه
ئهرهنیشته عهرهبیهکا و بهتایبه ئیجلاسو عهرهبی بهشدار
بۆ - بهلام ئا چێوه رهوشو جیابیهی تۆندو تێژتهر کهرۆ ,
مهسهلێ وارای ئهلفو بێ کۆردی جه عهرهبی پێ لاتینیا که
بهینیوهن جه مهحافلی سیاسی کوردی کوردستانیهنه تهرح کریان
. ههر پی بۆنۆ جه ئهوهلین ههرمانهنه دۆلهتو ههولێری
فێرکهردهی ئهلفوبێ لاتین به هه ش سه د مامۆسێ کوردیش ئهنجام
دان و پاسه که دیارا پی زوهنه ئی مامۆسێ فێرکهردهو
ئهلفوبێ لاتینی جه پهنجا مهدرهسێ - قۆتابخانێ - ئا
ههرێمهیه دهس پهنه کهرا .
ئی وارای ئهلفوبێ گرایشو ئیدئولوژیکو و وابهستهیی سیاسی رابهرا
کوردی نیشانه مدۆ ! واریای ئهلفو بێ عهرهبی به لاتین جه
جیاوازی ههرێمو کوردستانی جهعێراقی ترازیۆ و بهماناو جیاوازی
کوردهکا جه چوارچیوهو تهمهدونی ئێسلامین . پی جوره وارای
ئهلفوبێ به ماناو جیایی کوردهکا جه میراتی چندسهدسالهی میژو
فهرههنگی وێشانه.
فاریای -واریای - ئهلفوبێ باکورو عێراقی و دمایچشۆ جیابیهی جه
ویهردهی فهرههنگیشا وجیا بیهی جه فهرههنگو وهرکۆتی
دلێراسینی بهراسی تاسیرێ فرهتهر و قولتهر جه جیابیهی سیاسی
مارۆ وهرۆ . چی حالهتهنه, پێوهنێ فهرههنگی و مهعنهوی
کوردهکا عێراقی چهنی ههرێمهکهی بریۆ وه ئیتر نیازو زهرورهت
و ئیمکانێ پێ مهنهی جه چوارچێوهو عیراقی مهمهنۆ, چون مهتاوی
بهشێ سیاسی جه چوارچیوهی فهرههنگیش جیا کهریۆ . پێسه
ملیگهراکا تهرو ههرێمهکهی – خاورمیانه - ملیگهرا کوردهکێ
فرهتهر مهیلشا ئینا روهو دنیای غهربی و غهرب گهرێنێ .
میژوی ههمچهرخ نیشانهش دان که ئی جهرهیانه - ملی گهرایی -
جهنگی ناوخۆ , ئاشۆ و دژمهنی شۆنۆ وێشهره مارۆ . پرۆژهو -
بێگانهستیزی- که جه باکور و عێراقی ئینا جهرهیانهنه فره
سهخت تاوۆ دور جه ئی ئهنجامه وێرانکهرا بۆ !!
|
|
|
KWILE
, HAWRAMISH Culture Website.
Email to:
Nezam_solaimani@hotmail.com |
|
یانه
|
|
ئارشیو
|
|
پێوهنێ |
|
مهشاهیروهورامانی |
|
وێنێ جه هۆرامانی |
|
شیعروئهدهبو هۆرامانی
|
|
هۆرامانو توریسم |
|
هۆرامانو موسیقا
|
|
ئارشیو
|
|
ئارشیو
|
|
ئارشیو
|
|
ئارشیو
|
|
ئارشیو
|
|
|
|
|
|
|
|
|
|
|
|
|
